"İnanıram ki, Mançester Universiteti akademik inkişafım üçün ən doğru mühit olacaq"

İB Liseyi №6-nin məzunu Zeynəb Allahverdiyeva beynəlxalq ali təhsil qəbul mərhələsində böyük uğura imza atıb. O, Avropa, ABŞ və Türkiyənin tanınmış universitetlərindən qəbul təklifləri alaraq akademik nailiyyətlərini və qlobal baxışını bir daha sübut edib. Z.Allahverdiyevaya qəbul təklifi göndərən universitetlər sırasında Imperial College London, King’s College London, Edinburgh Universiteti, Mançester Universiteti, Maastricht Universiteti, Connecticut Universiteti (UConn), Rutgers Universiteti, Massachusetts Boston Universiteti, Illinois Urbana-Champaign Universiteti (UIUC), Sabancı Universiteti, həmçinin Azərbaycan Tibb Universiteti və Acıbadem Universiteti yer alıb. Zeynəb, Azərbaycan Tibb Universitetinin ingilisdilli tibb fakültəsinə də qəbul olunub. O, imtahansız qəbul edilən 35 IB tələbədən biridir. Bununla yanaşı, o, ilk mərhələdə təhsilini Mançester Universitetinin nüfuzlu Biotexnologiya ixtisası üzrə davam etdirmək qərarına gəlib. O, biotexnologiya üzrə təhsil almaqla gələcəkdə tibb təhsilinə başlamazdan əvvəl elmi biliklərini genişləndirmək və araşdırma təcrübəsi qazanmaq istədiyini bildirib. Litsey №6 müəllimləri və həmyaşıdları Zeynəbi çalışqan, iddialı və gələcəyə yönəlmiş bir şagird kimi xarakterizə edərək onun uğurunu digər tələbələr üçün ilham mənbəyi hesab edirlər. “IB yolunda mənə dəstək olan hər kəsə minnətdaram. Qəbul təklifləri mənim üçün bir çox qapılar açdı, lakin inanıram ki, Mançester Universiteti mənim akademik və şəxsi inkişafım üçün ən doğru mühit olacaq,” – deyə Zeynəb Allahverdiyeva bildirib. Güclü akademik bazası və beynəlxalq düşüncə tərzi ilə Zeynəb biotexnologiya sahəsində ümidverici bir yola qədəm qoyur və Azərbaycanın gənc nəslinin dünyada aparıcı universitetlərdə uğurla təmsil olunmasına töhfə verir.