“4 ildir ki, bunu tətbiq edirik” – TQDK sədri

Tələbə Qəbulu üzrə Dövlət Komissiyasında (TQDK) ali təhsil müəssisələrinə qəbul imtahanlarında 4 ildir ki, açıq tipli test tapşırıqları tətbiq edilir.

Simsar.az xəbər verir ki, bunu TQDK-da keçirilmiş mətbuat konfransında sözügedən qurumun sədri Məleykə Abbaszadə deyib.

O bildirib ki, testologiyada belə  tapşırıqlar qəbul proqramını daha dərindən mənimsəmiş, riyazi təfəkkürü  və analitik  təhlil qabiliyyəti güclü olan abituriyentlərin hazırlıq səviyyəsini  bir-birindən fərqləndirmək üçün nəzərdə tutulub. Qəbul imtahanlarında  hesablama, seçim, ardıcıllıq və uyğunluğu müəyyən etmək formalı 5 açıq tipli test tapşırığından istifadə edilir. Belə tapşırıqları tətbiq etməmişdən 2 il (2008-ci ildən) əvvəldən başlayaraq, hal-hazıradək “Abituriyent” jurnalının birinci nömrəsində bütün imtahan fənlərindən açıq tipli test tapşırıqlarına dair nümunələr verilir və cavab kartında necə qeyd edilməsi göstərilir. Həmçinin, 2009-cu ildən başlayaraq, bütün imtahan fənləri üzrə 5-11-ci siniflər üçün test kitabçalarında da açıq tipli test tapşırıqları nümunələri verilir. 2010-cu ildə yanvar ayında  və aprel-iyun aylarından başlayaraq, hal-hazıradək sınaq imtahanlarında belə tapşırıqlar sınaqdan keçirilir.

Qəbul imtahanlarında 2010-2013-cü illərdə hər ixtisas qrupunda iki fəndən açıq tipli test tapşırıqlarından istifadə olunub. Cədvəldə bu fənlərin qruplar üzrə çeşidi və həmin fənlərin müvafiq qrupdakı çəki əmsalları təqdim olunur.

Aysel Kərimova