Futbol üzrə Unibank Premyer Liqasında XXV tura yekun vurulub

Simsar.az-ın məlumatına görə, ikinci oyun günündə daha 3 görüş keçirilib. 

“Neftçi” “Qarabağ”a qalib gələrək, Ağdam təmsilçisinin 9 oyunluq qələbə seriyasına son qoyub. Tofiq Bəhramov adına Respublika stadionunda keçirilən görüşdə flaqmanın hər iki qolunu braziliyalı Rodriqinyo ilə Flavinyo vurub. Bununla da “Neftçi” liderliyini daha da möhkəmləndirərək, çempionluğa doğru önəmli addım atıb. “Qarabağ” isə 3-cü pillədə qalıb.

İlk “6-lıq” mərhələsinin digər görüşündə AZAL “İnter”i minimal hesabla məğlubiyyətə uğradıb. Bu qələbə nəticəsində “təyyarəçilər”lə “bankirlər” turnir cədvəlindəki mövqelərini dəyişiblər.

Autsayderlikdən qurtulmağa can atan “Simurq” “Turan”la görüşdə uduzaraq, vəziyyətini daha da çətinləşdirib. Bununla da Tovuz komandası təhlükəli zonada olan Zaqatala təmsilçisindən 9 xal aralanıb.

İlk oyun günündə 3 qarşılaşma baş tutub. İkinci “6-lığ”a təsadüf edən görüşlərdə heç-heçə qeydə alınıb. Yeni baş məşqçi Mehman Allahverdiyevin rəhbərliyi altında ilk matçına çıxan “Gəncə” “Qəbələ” ilə səfər matçında məğlubiyyətdən yaxa qurtara bilib. İlk yarıda meydan sahiblərindən Murad Hüseynov fərqlənib. Fasilədən sonra Junivan Suares bərabərlik qolunu vurub. MOİK isə “Muğan”la qolsuz heç-heçə edib.

Bu nəticələr komandaların turnir cədvəlindəki mövqelərinə heç bir təsir etməyib. “Qəbələ” 36 xalla 7-ci, “Muğan” 31 xalla 8-ci, “Gəncə” 25 xalla 9-cu, MOİK isə 8 xalla 12-ci pillədə qalıb.

Günün son matçında “Bakı” ilə “Xəzər Lənkəran” üz-üzə gəlib. Oyun boyu hər iki komandanın səylərinə baxmayaraq, hesab açılmayıb. Bununla da “Xəzər Lənkəran” çempionluq şanslarını daha da çətinləşdirib. Düzdür, 25 oyundan sonra xallarını 49-a çatdıran Lənkəran komandası 2-ci pilləyə yüksəlib. Lakin flaqman aprelin 3-də “Qarabağ”ı yendiyi üçün ən yaxın izləyicisindən 6 xal aralanıb.

2 aprel (şənbə)

MOİK (Bakı) – “Muğan” (Salyan) – 0:0

“Qəbələ” – “Gəncə” – 1:1
Murad Hüseynov, 26 - Junivan Suares, 56

“Bakı” – “Xəzər Lənkəran” – 0:0

3 aprel (bazar)

“Simurq” (Zaqatala) – “Turan” (Tovuz) – 0:1
Georgi Beriaşvili, 8

AZAL (Bakı) – “İnter” (Bakı) – 1:0
Gennadi Bliznyuk, 45

“Neftçi” (Bakı) – “Qarabağ” (Ağdam) – 2:0
Rodriqinyo, 3. Flavinyo, 60



Komanda O Q H  M  Qollar  Xallar 

1 Neftçi  25  16  7  2  44-10  55 

2 Xəzər Lənkəran  25  14  7  4  29-14  49 

3 Qarabağ  25  15  3  7  33-16  48

4 AZAL  25  11  9  5  29-17  42 

5 İnter  25  12  5  8  25-20  41 

6 Bakı  25  9  8  8  29-23  35 

7 Qəbələ  25  9 9  7  23-17  36 

8 Muğan  25  8  7  10  18-26  31 

9 Gəncə  25  5  10  10  24-30  25 

10 Turan  25  6  6  13  20-35 24 

11 Simurq  25 3  6  16  14-38  15 

12 MOİK  25  1  5  19  7-49  8