Bu gün UEFA Super Kubokunun sahibi bəlli olacaq
Simsar.az xəbər verir ki, “Kardiff Siti” stadionunda baş tutacaq matçda Çempionlar Liqasının qalibi “Real Madrid” və Avropa Liqasının çempionu “Sevilya” üz-üzə gələcək.
Oyundan əvvəl keçirilən mətbat konfransında jurnalistlərin qarşısına çıxan “Kral klubu”nun baş məşqçisi Karlo Ançelotti rəqibi tərifləyib: “Çox çətin bir rəqiblə qarşılşacağıq. “Sevilya” ilə “La Liqa” oyunlarında dəfələrlə mübarizə aparmışıq və bu komanda bizi bir neçə dəfə məğlub edə bilib. Bu matç bizim üçün çox vacibdir. Çünki bu görüşdəki nəticə gələcək mövsümə böyük təsir edəcək”.
“Sevilya”nın məşqçisi Unai Emeri isə olduqca iddialıdır: “Biz qələbə üçün gəlmişik. Ötən mövsüm Avropada çox gözəl nəticələr əldə etdik və Super Kubokla uğurumuzun davamını gətirmək niyyətindəyik”.
Qeyd edək ki, qarşılaşma Bakı vaxtı ilə saat 23:45-də start götürəcək. Oyun İdman Azərbaycan kanalı ilə canlı yayımlanacaq.
Vüsal Məmmədzadə