Bu gün Çempionlar Liqasında yarımfinal mərhələsinə start veriləcək. Simsar.az xəbər verir ki, ilk oyun günündə baş tutacaq qarşılaşma Madriddə keçiriləcək.
İspaniya çempionatının lideri “Atletiko” öz meydanında “Çelsi”ni sınağa çəkəcək. Pireneylilər 2 il əvvəl Superkubokda 4:1 hesabı ilə darmadağın etdiyi İngiltərə klubundan üstün olduğunu bu dəfə də sübut etməyə çalışacaqlar.
London klubu isə 2009/10 mövsümündə qrupda üstələdiyi “Atletiko”ya gücünü göstərmək iddiasındadır. 5 il əvvəl Madriddə 2:2 hesabı ilə kifayətlənən “Çelsi” öz meydanında 4 cavabsız qolla sevinmişdi.
Bugünkü matç həm də “Atletiko”nun qapıçısı Tibo Kurtua üçün əlamətdar olacaq. İcarə əsasında İspaniyada çıxış edən qolkiper müqavilə ilə məxsus olduğu komandaya qarşı oynayacaq.
Çempionlar Liqası
Yarımfinal, ilk oyun
22 aprel
23:45. “ATLETİKO” (İspaniya) – “ÇELSİ” (İNGİLTƏRƏ)
Baş hakim: Yonas Eriksson (İsveç)
Madrid. Visente Kalderon stadionu