Veteran futbolçu Vəli Qasımovun hazırda davam edən Azərbaycan Premyer Liqası və klubların son vəziyyəti ilə bağlı fikirlərini öyrəndik. Simsar.az həmin müsahibəni diqqətinizə çatdırır.
- “Qarabağ” çempionluq yarışında ən yaxın izləyicisindən 10 xal öndədir. Sizcə, Ağdam təmsilçisini çempion kimi təbrik etmək olar?
- Bu, hələ tezdir. Ancaq düşünmürəm ki, “Qarabağ” fürsəti əldən versin. Gözəl heyətə malikdirlər. Stabil oyun sərgiləyirlər və bu da çempion olmağa kifayət edir.
- Ağdam təmsilçisi çempion olsa, hazırkı vəziyyətdə UEFA Çempionlar Liqasında komandadan nələr gözləmək olar?
- “Qarabağ”ın yaxşı heyəti var. Bu heyətlə qabağa getmək olar. Amma Çempionlar Liqasında bir az da bəxt lazımdır. Güclü komandalar mübarizə aparır. Püşkatmada bəxt “Qarabağ”ın tərəfində olsa, çox şeyə ümid edə bilərik. Qurban Qurbanovun komandası Çempionlar Liqasında oynamağa qadirdir. Lakin, dediyim kimi, bəxt amili mühüm rol oynayacaq.
- “Qəbələ” çempionluq yarışına şərik komandalardan idi. Amma birdən-birə komandada nələrsə baş verdi. Ardıcıl məğlubiyyətlərə səbəb nə oldu?
- “Qəbələ”nin oyununu izləyəndə görmək olurdu ki, bu komanda çempionluq yarışında uduzacaq. Qeyri-stabil oyun sərgiləyirdilər. Bu cür oyunla çempion olmaq olmaz. “Qəbələ” də buna görə, liderlər qrupundan aralı düşdü.
- Mustafa Denizlinin gəlişi hələ ki, “Xəzər Lənkəran”da heç nəyi dəyişməyib. Gələn mövsüm məşqçidən nəsə gözləməyə dəyər?
- Hər bir məşqçinin vaxta ehtiyacı var. Eləcə də, Mustafa Denizlinin. Hazırda “Xəzər Lənkəran”da köklü dəyişikliklər edilməlidir. Məşqçiyə vaxt verilsə, istədiyi heyəti formalaşdıra bilər. Yalnız bundan sonra “Xəzər Lənkəran”dan nəticə gözləmək olar.
Vüsal Məmmədzadə