“Yahoo!” şirkətinin keçmiş əməliyyat direktoru Enriko de Kastro işdən qovulduğu üçün korporasiyanın tarixində olmuş ən yüksək məbləğli təzminatlardan birini alacaq. Simsar.az xarici KİV-ə istinadən xəbər verir ki, Kastro 109 milyon dollar dəyərində təzminat alacaq. Beləliklə, hesabladıqda istirahət günləri də daxil olmaqla Kastronun orda işlədiyi müddətdə hər gün 244 min dollar aldığı hesab edilir. “Qızıl paraşüt” adlandırılan bu məbləğ Kastronun şirkətdə işlədiyi 15 ayın əvəzində veriləcək. Qeyd edək ki, Kastro “Yahoo!” şirkətinə “Google” korporasiyasından keçib. Onu işdən azad edən “Yahoo!”-un müdiri Marissa Mayer bundan əvvəl Google-da işləyib və elə o Kastronun Yahoo!-ya keçməsinə səbəbkar olub. Onların nə səbəbdən yola getmədikləri və Kastronun niyə işdən çıxarıldığı məlum deyil.
Mələk Abbaszadə