İdmançımız London 2012-yə daha bir vəsiqə qazandı
“Altınci lisenziyanın qazanılmasına şadam. Məhəmməd özünü yaxşı tərəfdən göstərdi və bu vacib döyüşdə ləyaqətinə görə qalib oldu”. Apasport.az saytının xəbərinə görə, bu sözləri Azərbaycan Boks Federasiyasının prezidenti Kəmaləddin Heydərov deyib.
Azərbaycan boksçusu Məhəmməd Abdülrəhimov Trabzonda keçirilən olimpiya lisenziyalı turnirində London-2012-yə vəsiqə qazanıb.
Bununla bağlı fikirlərini bildirən K.Heydərov komandamızın çıxışından razı qaldığını söyləyib: “Ümumilikdə, komandamızın çıxışı məni razı saldı. Əlbəttə, hamısı Londona vəsiqə qazana bilməyiblər. Lakin, nəzərə almaq lazımdır ki, bu, çox güclü turnirdir. Olimpiyadaya düşmək üçün son şansdır.
Hər ölkə bu şansı maksimal dərəcədə istifadə etməyə çalışır. Bizim isə ikinci lisenziyanı qazanmaq şansımız var. Ümidvaram ki, Vətən Hüseynli də Londona vəsiqə əldə edə biləcək”.