Cüdo üzrə olimpiya çempionu Elnur Məmmədliyə yeni vəzifə təklif olunub.
Simsar.az-ın əldə etdiyi məlumata görə, 2008-ci il Pekin Yay Olimpiya Oyunlarının qalibinə Bakının 8-ci km qəsəbəsində yerləşən “Start” İdman və Əyləncə Kompleksinin direktoru vəzifəsi təklif olunub.
Bundan başqa qurğunun adının dəyişdiriləcəyi və “Bakı” İdman Kompleksi adlanacağı bildirilir.
Məmmədlinin özü Lent.az-a açıqlamasında belə bir təklif aldığını təsdiqləyib. Lakin o, hələlik konkret qərar qəbul etmədiyini söyləyib: “Hələ təklif üzərində düşünürəm. Çıxış etdiyim cüdo yığmasının baş məşqçisi Ağayar Axundzadə ilə də məsləhətləşməliyəm. Bu işin cüdoçu kimi çıxışlarıma necə təsir edəcəyini də ölçüb-biçməliyəm”.
Olimpiya çempionumuz yekun qərarı yanvarın əvvəllərinədək verəcəyini əlavə edib.
Qeyd edək ki, Elnur Məmmədli 2008-ci il Pekin Yay Olimpiya Oyunlarında 73 kq çəki dərəcəsində qızıl medal qazanıb. O, 2012-ci il London olimpiadasına 81 kq çəkidə lisenziyanı böyük ölçüdə təmin edib. Hazırda Məmmədli Bakı şəhəri üzrə Yol Patrul Xidmətinə (YPX) baş müfəttiş vəzifəsində də çalışır, polis kapitanıdır.