Qadağa Avropa çempionatında qüvvəyə minəcək
UEFA gələn il Ukrayna və Polşada təşkil olunacaq Avropa çempionatı öncəsi vacib qərar qəbul edib. Qol.Az-ın məlumatına görə, ali futbol qurumu final mərhələsinin oyunlarını qəbul edəcək stadionlarda tütün məmulatlarının satışı və reklamını qadağan edib.
UEFA-nın bu proqramı Ümumdünya Səhiyyə Təşkilatı, Dünya Ürək Federasiyası və təşkilatçı ölkələrin yerli komitələri ilə birgə həyata keçiriləcək. Futbol qurumunun bu qərarı bütün dünya ölkələrinin azarkeşləri üçün ciddi siqnaldır. Gələcəkdə bütün turnirlərdə tütün məmulatlarından istifadə qadağan olunacaq.
Vacib qərarla bağlı təəssüratlarını bölüşən UEFA prezidenti Mişel Platini isə bunları dilə gətirib: “Avropa çempionatının siqaretdən azad olması azarkeşlərin və turnir iştirakçılarının sağlamlığına qulluq edir. Biz Avro-2012 üçün sağlam həyat, təhlükəsizlik və rahatlıq prinsiplərini dəstəkləyirik. Tütün isə bura aid deyil”.