Tədbir sentyabrın 28-i başlayacaq
II Bakı Beynəlxalq Kitab Sərgi-Yarmarkası təşkil olunacaq. Mədəniyyət və Turizm Nazirliyinin mətbuat xidmətindən simsar.az-a verilən məlumatda sərgiyə hazırlıq işlərinin bitmək üzrə olduğu bildirilir.
Tədbirin şərtlərinə görə, sentyabrın 15-də iştirakla bağlı sənədlərin qəbulu başa çatıb. İndiyədək Azərbaycandan 88, xarici ölkələrdən 21 çap-poliqrafiya müəssisəsi və kitabxana qeydiyyatdan keçib.
Dövlət müstəqilliyinin bərpasının iyirminci ildönümünə həsr olunan sərgi sentyabrın 28dən 30-dək Əl Oyunları İdman Sarayında keçiriləcək.
Nazirliyin məlumatına görə, kitab sərgi-yarmarkasının zəngin proqramı var. Tədbir çərçivəsində kitab təqdimatları, tanınmış yazarlarla görüşlər, ədəbi-bədii gecələr, simpoziumlar düzənlənəcək. Sərginin sonunda Təşkilat Komitəsi tərəfindən ən yaxşı nəşriyyat və ən yaxşı kitab mükafatlandırılacaq.
I Bakı Beynəlxalq Kitab Sərgi-Yarmarkası 2009-cu ilin sentyabrında Muzey Mərkəzində uğurla keçirilmişdi.
Arifə