Beynəlxalq Atom Enerjisi Agentliyinin (BAEA) yaydığı məlumata əsasən, İran nüvə proqramının dinc məqsədlər üçün istifadəsinə dair bu ilin iyul ayında bağlanmış razılaşmanın şərtlərinə riayət edir. Məlumatda bildirilir ki, sanksiyaların ləğv olunması istiqamətində konkret addımlar atan İran tərəfi “Natans” və “Fordo” nüvə obyektlərindəki sentrifuqaların sayını 4500 ədəd azaldıb. Bundan sonra həmin nüvə strukturlarındakı sentrifuqaların ümumi sayı 15500 ədədə düşüb.

Ləğv edilmiş sentrifuqalar uranın zənginləşdirilməsi üçün hələ istifadəyə verilməmiş elementlər olub. Uranın zənginləşdirilməsi üçün artıq istifadə edilən sentrifuqaların ləğvi nisbətən mürəkkəb proses olsa da qısa zamanda – 2016-cı ilin birinci rübü ərzində bu mərhələ də yekunlaşmalıdır.

“Altılıq” ölkələri ilə İran arasında bağlanmış sazişə əsasən, İranın nüvə obyektlərindəki sentrifuqaların ümumi sayı 6 mindən artıq ola bilməz. Yalnız bundan və digər şərtlər icra olunduqdan sonra Tehrana qarşı beynəlxalq iqtisadi sanksiyalar ləğv ediləcək.