Tələbə Qəbulu üzrə Dövlət Komissiyasının (TQDK) sədri Məleykə Abbaszadə Xaçmaz şəhərində vətəndaşlarla görüş keçirib.

TQDK  sədri Məleykə Abbaszadənin mərkəzi icra hakimiyyəti orqanları rəhbərlərinin şəhər və rayonlarda vətəndaşların qəbulu cədvəlinə uyğun olaraq görüşləri davam edir.
Komissiya sədrinin növbəti qəbulu fevralın 27-də Xaçmaz şəhərində təşkil olunmuşdur. Qəbulda Xaçmaz şəhər sakinləri ilə yanaşı, Quba, Qusar, Şabran, Siyəzən və Xızı rayonlarının sakinləri və həmin rayonlarda məskunlaşmış məcburi köçkünlər iştirak ediblər.
Görüşdən öncə TQDK-nın sədri Xaçmaz şəhərində ulu öndər Heydər Əliyevin adını daşıyan parka gələrək ümummilli liderin abidəsini ziyarət etmiş və abidənin önünə gül-çiçək dəstələri düzüb.

Vətəndaşlar ali təhsil müəssisələrində bir ixtisasdan digər ixtisasa köçürülmə , 2014-cü ildə keçirilmiş imtahanların nəticələrinə dair statistik məlumatlar , ali və orta ixtisas təhsili müəssisələrinə qəbul qaydalarında edilmiş dəyişikliklərlə bağlı Komissiya sədrinə müraciət etmişlər. Bununla yanaşı, görüşə gələnlər tələbə köçürmələri, qabiliyyət imtahanları və s. məsələlərlə bağlı Komissiya sədrinə rəy və sorğularını bildiriblər.
TQDK-nın səlahiyyətlərinə aid olan müraciətlərin əksəriyyəti yerindəcə öz həllini tapmışdır. Komissiyanın səlahiyyətlərinə aid olmayan müraciətlərin aidiyyəti qurumlara çatdırılacağı vətəndaşlara bildirilib.

Aysel Kərimova