Ekologiya və Təbii Sərvətlər Nazirliyinin aidiyyəti qurumlarının əməkdaşları tərəfindən ölkə ərazisində “Ovçuluq haqqında” Azərbaycan Respublikası Qanununun tələblərinə əməl olunması vəziyyətinin araşdırılması məqsədi ilə növbəti reydlər keçirilib.

Nazirliyin mətbuat xidmətindən Simsar.az-a verilən məlumata görə, oktyabrın 29-da keçirilmiş reydlər zamanı Zaqatala rayonunun Valdar kəndi ərazisində və Ağcabədi rayonunun Avşar kəndi ərazisində qanunsuz ovla məşğul olan şəxslər saxlanılıblar. Qanunsuz ov edən Valdar kənd sakini Vüsal Əliyev və Ağcabədi şəhər sakini Həsən Məmmədovdan 2 ov tüfəngi və 29 ədəd patron götürülüb.

Oktyabrın 30-da isə Samux Dövlət Ovçuluq Təsərrüfatının ərazisində Şəmkir rayonunun Kür qəsəbəsi sakini Rüfət Hüseynov və Bakı şəhər sakini Elnur Salahovun qanunsuz ov etdikləri aşkar edilib. Onlardan 2 ov tüfəngi və 4 ədəd patron götürülüb.

Oktyabrın 31-də keçirilmiş reydlər zamanı Korçay Dövlət Təbiət Qoruğu ərazisində Goranboy rayonunun Qazaxlar kənd sakini Mahir Xəlilov və Ağgöl Milli Parkının ərazisində İmişli rayonunun Yalavac kənd sakini Gürşad Əliyev qanunsuz ov etdikləri üçün saxlanılaraq onlardan 2 ov tüfəngi və 2 ədəd patron götürülüb.

Üç gün ərzində inzibati xətaya yol vermiş qanun pozucuları barəsində müvafiq qaydada akt və protokollar tərtib edilərək hər biri 1000 manat məbləğində cərimə edilib.

Ekologiya və Təbii Sərvətlər Nazirliyinin aidiyyəti qurumları tərəfindən qanunsuz ov hallarının qarşısının alınması məqsədi ilə reydlər davam etdirilir.