Ermənilər tərəfindən Kəlbəcərdə öldürülən Həsən Həsənov Dağlıq Qarabağda dəfn edilib.

Beynəlxalq Qızıl Xaç Komitəsinin (BQXK) Azərbaycan nümayəndəliyinin mətbuat katibi İlahə Hüseynovanın ANS PRESS-ə verdiyi məlumata görə, BQXK-nin Dağlıq Qarabağ ofisi azərbaycanlı ailə tərəfindən qohumu kimi identifikasiya olunmuş adamın dəfn olunması barədə məlumatlandırılıb.

Dəfndə müşahidəçi qismində iştirak edən nümayəndənin sözlərinə görə, dəfn zamanı meyitə hörmətlə yanaşılıb.

İlahə Hüseynova həmçinin qeyd edib ki, Həsən Həsənovun dəfn olunmasına baxmayaraq BQXK meyitin geri qaytarılması üçün danışıqları davam etdirir.

Xatırladaq ki, 3 azərbaycanlı iyulun 11-də Kəlbəcərdə girov düşüblər. Şahbaz Quliyev və Dilqəm Əsgərovu girov götürən ermənilər Həsən Həsənovu müqavimət göstərdiyi üçün öldürüb. Ermənilər hər 3 azərbaycanlını diversant kimi təqdim edirlər.