Qatar 18-19 martda Bakıdan, 19-20 martda isə Böyük Kəsikdən yola düşəcək

Sərnişin sıxlığını azaltmaq üçün 18-19 mart tarixlərində Bakı-Böyük Kəsik-Bakı istiqamətində dəmir yolu xəttinə əlavə qatar qoşulacaq.


“Azərbaycan Dəmir Yolları» Qapalı Səhmdar Cəmiyyətinin mətbuat katibliyinin rəisi Nadir Əzməmmədov Lent.az-a bildirib ki, bayram günlərində sərnişin axınının artması adi hala çevrilib. Onun sözlərinə görə, sərnişinlər rahat və ucuz nəqliyyat vasitəsi kimi dəmir yolunun xidmətlərindən istifadəyə üstünlük verirlər. Bu səbəbdən də QSC-nin Sərnişin daşımaları Departamentinin kollektivi qarşıdan gələn Novruz bayramı ilə əlaqədar gücləndirilmiş iş rejiminə keçib.


Nadir Əzməmmədov bildirib ki, Səhmdar Cəmiyyətin sədri Arif Əsgərovun müvafiq əmri ilə sərnişin sıxlığını azaltmaq üçün Bakı-Böyük Kəsik-Bakı istiqamətində 668/667 saylı əlavə sərnişin qatarı xəttə buraxılacaq. Qatar 18 və 19 mart 2011-ci il tarixlərində Bakıdan, 19 və 20 mart 2011-ci tarixlərində Böyük Kəsikdən yola düşəcək.


Bundan başqa, sərnişin sıxlığını qismən də olsa aradan qaldırmaq üçün Sərnişin daşımaları Departamentin kollektivi ölkə daxilində hərəkət edən sərnişin qatarlarına hər gün 10-15, bəzən də 20-30 ədəd əlavə vaqon qoşulmasını təmin edir.


QSC rəsmisi xatırladır ki, sərnişin qatarlarına 10 gün qabaqcadan bilet satışı həyata keçirilir. Əlavə vaqonlara isə bilet satışı həmin vaqon qatara qoşulan gün aparılır.