Azərbaycanda bu xəstəliyin 8 növü var

Hazırda dünyada 3,3 milyard insan, yəni dünya əhalisinin yarısı malyariya ilə yoluxma riski altında yaşayır.
Ümumdünya Səhiyyə Təşkilatının (ÜST) Azərbaycandakı ofisindən Simsar.az-a verilən məlumata görə, 2010-cu ildə dünyada 216 milyon malyariya hadisəsi qeydə alınıb. Onlardan 655 mini ölümlə nəticələnib. Qeydə alınan malyariya hadisələrinin 81 faizi, ölüm hallarının isə 91 faizi Afrika regionunda baş verib. 2000-ci il ilə müqayisədə 2010-cu ildə dünyada malyariya ilə xəstələnmə 17, malyariyadan ölüm hadisələrinin sayı isə 26 faiz azalıb. 

ÜST-ün məlumatına əsasən, 2011-ci ildə Azərbaycanda cəmi 8 (4 yerli, 4 xaricdən gətirilmə) malyariya ilə xəstələnmə hadisəsi qeydə alınıb. Təşkilatdan bildirilib ki, Azərbaycanda malyariyaya görə vəziyyət 1990-cı ildən sonra sürətlə pisləşməyə başlayıb. Baş vermiş epidemiya 1996-cı ildə ən yüksək səviyyəyə çatıb. Həmin il malyariya hadisələrinin sayı 13135 olub. Lakin ölkədə geniş miqyaslı əksepidemik tədbirlərin aparılmasının nəticəsində malyariyaya görə epidemioloji vəziyyət nəzərəçarpacaq dərəcədə yaxşılaşıb.

Qeyd edək ki, 25 aprel Beynəlxalq Malyariya Xəstəliyi ilə Mübarizə Günüdür. 2008-ci ildə Azərbaycanda Malyariyanın Eliminasiyası üzrə 2008-2013-cü illər üçün Milli Strategiya və tədbirlər Planı qəbul edilib.
Yeni milli strategiyanın son məqsədi, respublikanın malyariogen rayonlarında 2013-cü ilədək malyariya ilə yerli yoluxmaların kəsilməsi və onun eliminasiyasıdır.