«Qanunsuz tikilən evlərin şəhər kanalizasiyasına qoşulmaması nəticəsində bu cür hadisələr baş verir»  

Son günlər Bakı şəhərində sürüşmə hadisələri intensiv xarakter alıb. Xətai rayonunda, Zığ qəsəbəsindəki sürüşmələrin nəticəsində yaşayış binalarına da ciddi ziyan dəyib. Bəzi binaların sakinləri evukuasiya ediliblər, binalarda çat əmələ gəlib. Bunun ardınca bu günlərdə Azərbaycanın bir neçə rayonunda zəlzələ də baş verdi.

Ekoloji Proqnozlar Mərkəzinin rəhbəri Telman Zeynalov Simsar.az-a açıqlamasında bildirib ki, sürüşmələrin intensiv xarakter alması təkcə, təbii faktorlarla bağlı deyil. Qadağan olunan yerlərdə evlərin tikilməsi sürüşmənin baş verməsinə gətirib çıxarır: «Azərbaycan müstəqillik əldə edəndən sonra şəxsi mülkiyyətlərin sayı artdı, kim harada istəyirsə, ev tikməyə başladı. Həmin tikililər şəhərin kommunikasiya sisiteminə qoşulmadığından çirkab suları necə gəldi axıdılır. Nəticədə bu sular yerin qatında yerləşən ağır gilə təsir edir. Ay ərzində 1-2 mm su gedirsə, gil sabun kimi olur və buna görə də sürüşür. Əslində həmin ərazilərdə tikinti qadağan olunmalıdır. Burada ev tikən əhali özü bunu bilməlidir. 100 minlərlə xərc çəkilir, villalar tikilir, sonunda da bu xərclərin hamısı batır. Sonra da kompensasiya istəyirlər».
T.Zeynalovun sözlərinə görə, Sovet dövründə sürüşmənin qarşısının alınması üçün həmin ərazilərdə pilləli terostatlar qurulur, üzərinə ağaclar əkilirdi.

Zəlzələlərin intensivləşməsinə gəlincə, Seysmoloji Mərkəzin mətbuat xidmətinin rəhbəri Vüsalə Rafiqqızının dediyinə görə, bu sırf təbii proseslərin nəticəsidir. Yaxın vaxtlarda ölkəmizdə güclü zəlzələ təhlükəsinin olub-olmadığına gəlincə, V.Rafiqqızı dedi ki, bunu proqnozlaşdırmaq qeyri- mümkündür.

Xatirə