30 Sentyabr, 2011
Qənirə Paşayeva siqaret çəkənlərin cəzalanmasını istəyir

Təklif: İnzibati Xətalar Məcəlləsinə dəyişiklik edilsin

“Milli Məclisdə ölkədə ictimai yerlərdə siqaret çəkilməsinin qadağan edilməsi müzakirəyə çıxarılmalıdır”. Lent.az-ın məlumatına görə, bunu parlamentin payız sessiyasının ilk iclasında millət vəkili Qənirə Paşayeva bildirib.

Onun sözlərinə görə, tütündən istifadə etmək tək siqaret çəkənin deyil, onun ətrafında olanlarının da səhhətinə ziyan vurur: “Avropa ölkələrində bununla bağlı qanun var və bütün ölkələrdə bu qanun effektiv olduğunu qeyd edirlər. Bakıda qarşıdan gələn “Eurovision” mahnı müsabiqəsi vaxtı minlərlə avropalı və digər yerlərdən gələ qonaqların hər yerdə siqaret çəkilməsinin şahidi olması xoş deyil”.

O həmçinin ölkədə uşaqların siqaret almasına şərait olduğunu qeyd edərək bildirib ki, valideynlər bu məsələyə nəzarət edə bilmirlər. Paşayeva tütündən istifadənin məhdudlaşdırılması ilə bağlı qanun layihəsinin məhz Milli Məclisin payız sessiyasında qəbul olunması təklifini irəli sürüb.

Millət vəkili Eldar İbrahimov iclasda bildirib ki, Azərbaycanda 2000-ci illərin əvvəlində tütünün istifadəsi ilə bağlı müvafiq qanun qəbul edilib və həmin qanunda müvafiq müddəa var: “Bu səbəbdən təklif edərdim ki, İnzibati Xətalar Məcəlləsinə dəyişiklik edilsin və ictimai yerlərdə siqaret çəkənlər 50-100 manat cərimə yazılsın”. Onun sözlərinə görə, bu praktika bir sıra ölkələrdə, o cümlədən Türkiyədə də var.

Bütün hüquqlar qorunur  ©  SİMSAR.az | Bizi özünüzə Simsar bilin!

Saytın materiallarından istifadə yalnız administrasiyanın şifahi, ya yazılı razılığı əsasında mümkündür!