22 Sentyabr, 2011
AZƏRBAYCAN ÜZRƏ RADON XƏRİTƏSİ TƏRTİB EDİLİB

Azərbaycan Milli Elmlər Akademiyasının (AMEA) Geologiya İnstitutu Azərbaycan üzrə radon xəritəsi tərtib edib.

Bu barədə institutun geoloji mühitin qamma spektrometriyası şöbəsinin müdiri Çingiz Əliyev məlumat verib. O bildirib ki, İsveçrənin Elm Fondu və Səhiyyə Nazirliyi ilə birgə həyata keçirilən layihə əsasında Azərbaycanın rayonlarında yaşayış binalarında radon qazının yaratdığı problemlər araşdırılıb. Aparılan tədqiqatları müzakirə etmək üçün tədqiqat qrupu oktyabrın 10-da İsveçrəyə gedəcək.

Ç. Əliyev deyib ki, araşdırmalara əsasən, radon qazının miqdarı ilə bağlı vəziyyətin norma daxilində olduğu aşkarlanıb: “Böyük Qafqaz və Kiçik Qafqaz ərazisindən tektonik qırılmalar keçdiyinə görə, bu ərazilərdə radon qazının miqdarı bir qədər artıqdır. Aşağı Kür çökəkliyində isə bu qazın miqdarı azdır”.

Qeyd edək ki, radon qazı yeraltı çatlardan və tikinti materiallarından yaranır. Bu qazın normal miqdarı köhnə yaşayış evlərində 200 bk/kub metr, yeni evlərdə isə 100 bk/kub metrdir.

Bütün hüquqlar qorunur  ©  SİMSAR.az | Bizi özünüzə Simsar bilin!

Saytın materiallarından istifadə yalnız administrasiyanın şifahi, ya yazılı razılığı əsasında mümkündür!