O, təcili olaraq Bakıya gətirilib
Qazax rayonunun Ermənistanla sərhəddə yerləşən Məzəm kəndində ailəsilə istirahət edərkən erməni silahlı qüvvələri tərəfindən snayperlə vurulan 23 yaşlı Rahibə Poladovanın vəziyyəti qəflətən ağırlaşıb. O, təcili olaraq Bakıya Mirqasımov adına Respublika Xəstəxanasına gətirilib. Respublika Xəstəxanasının həkimi Vidadi Həsənovun verdiyi məlumata görə, Rahibə Poladova reanimasiya şöbəsinə yerləşdirilib və vəziyyəti ağır olaraq qalır.
Onun müalicə olunduğu Qazax rayon Mərkəzi Xəstəxanasının cərrahı Bünyamin Abbasəliyev bildirib ki, xəstənin bədənindən güllə çıxarılsa da, vəziyyəti yaxşılaşmayıb. “Güllə xəstənin kürək nahiyəsindən döş qəfəsini dəlib keçib. Sağ bazu sümüyü qırılıb. Güllə xəstənin daxilində qalmışdı. Əməliyyat aparıldı və güllə cıxarıldı. Amma hazırda xəstənin vəziyyəti ağırdır”, - deyə o bildirib.
Zərərçəkənin qohumlarının verdiyi məlumata görə, əməliyyatdan sonra baş verən qanaxma xəstənin vəziyyətinin daha da ağırlaşmasına səbəb olub. Rahibə Poladovadan əməliyyat zamanı çıxarılan güllə isə ekspertiza üçün paytaxta göndərilib. Yaralının anası İlhamə Poladova hadisə zamanı qızının yanında olduğunu deyib.
Hadisəni araşdıran Qazax rayon Prokurorluğundan verilən məlumata görə, Rahibə Poladova Məzəm kəndindəki gölün ətrafında istirahət edərkən güllə yarası alıb. Hadisə vaxtı tanışı Məzahir Məmmədov da onunla birgə olub. Bir uşaq anası olan Rahibə Poladova Qazaxın Bağanes Ayrım kəndindən məcburi köçkün kimi müvəqqəti olaraq rayon mərkəzində məskunlaşıb. Ermənistan silahlı qüvvələrinin cəbhə xəttinə yaxın Azərbaycan ərazilərində snayperdən atəş açdıqları ilk mülki vətəndaş deyil. Ötən ildən bəri ermənilərin atəşkəsi pozması 5 mülki şəxsin həyatına son qoyub.
Qeyd edək ki, 2008-ci ilin dekabrında həmsədrlər ölkələrin, eləcə də münaqişə tərəflərinin xarici işlər nazirlərinin birgə imzaladığı bəyanatda hərbçilərin və mülki şəxslərin həyatını qorumaq məqsədilə snayperlərin təmas xəttindən geri çəkilməli olduğu qeyd edilib. Ermənistan-Azərbaycan prezidentlərinin son görüşlərində də cəbhə xəttində snayperlərin fəallaşması pislənib. Amma erməni snayperləri dinc sakinləri hədəfə almaqda davam edir.
Aybəniz Haşımovanın tələbələri xarici tamaşaçıları heyrətləndirib - VİDEO
Mahsun Kırmızıgül Bakıya gəlir
Narkotik vasitələrin qanunsuz dövriyyəsi ilə məşğul olan şəxslər saxlanılıblar 
İlham Əliyev Berlindədir
.jpg)
