Rusiyanın xalq artisti Filipp Kirkorov Azərbaycanda solo-konsert verəcək
Bu barədə açıqlamasında müğənninin mətbuat xidmətinin rəhbəri Gennadiy Rıbak deyib. O bildirib ki, rusiyalı müğənni bu ilin oktyabr ayında Bakı səhnəsində pərəstişkarları qarşısında çıxış edəcək. G. Rıbak konsertlə bağlı danışıqların baş tutduğunu və müvafiq razılığa gəlindiyini, ancaq konsertin dəqiq gününün hələ təyin olunmadığını qeyd edib. F. Kirkorovun Azərbaycandakı konsertə xüsusi hazırlaşdığını da dilə gətirən sənətçinin mətbuat xidmətinin rəhbəri proqramın uzun müddət yaddaşlara həkk olunacağını vurğulayıb.
Qeyd edək ki, Filipp Kirkorov Azərbaycan səhnəsində ilk dəfə bu ilin mart ayında Heydər Əliyev Sarayında bəstəkar İqor Krutoyun yaradıcılıq gecəsində çıxış edib. Sənətçi həmin konsertdə Azərbaycanda solo-konsert vermək arzusunda olduğunu dəfələrlə qeyd edib: “Hamı mənim Azərbaycanı nə qədər sevdiyimi bilir. Ancaq çoxları mənim bura gəlməyimə mane olsalar da, buna çata bilmədilər. Hazırda elə bil yuxudayam və bu yuxudan oyanmaq istəmirəm. Bu gün sizinlə İqor Krutoyun gecəsində görüşürük. Ancaq çox arzu edirəm ki, sizin qarşınızda öz solo-konsertimlə, xüsusi bir proqramla çıxış edim”.