Hansı aşiq söylə ki, hicrində nalan olmadı,
Yanmayıb eşq içrə hərdən, qəlbi viran olmadı.
Atəşi - hİcrində yandım ol məhin sübhi - məsa,
Leyk camalın gizlədib əbr içrə taban olmadı.
Söylədi "bərdən səlamən" nari - Nəmrudə o dəm,
Bəs neçin mən yandığım atəş gülüstan olmadı?
Aşiqi - zarın bütün xəlq içrə rüsva eyləyib,
Mübtəla halın görüncə heç peşiman olmadı.
Vəsf qıl, ey xəstə könlüm gül cəmalın ol yarın,
Gizlədib min işvə ilə, gər nümayan olmadı.
Şikvə etməm möhnətində, hər bəlayə raziyam
Hansı aşiq dərd ilən çaki giriban olmadı?
Hali-zarim cox təlaş etdim nihan olsun, vəli
Ruyi-zərdim faş edib əğyarə pünhan olmadı.