Hacıyevin vəkili Elçin Namazov məlumat verib
Gəncə Şəhər Nizami Rayon Məhkəməsində keçmiş deputatlığa namizəd Bəxtiyar Hacıyevin cinayət işi üzrə məhkəmə prosesi təxirə salınıb. Bu barədə APA-ya B. Hacıyevin vəkili Elçin Namazov məlumat verib. O, prosesin təxirə salınmasının səbəbini hələ ki, öyrənə bilmədiyin deyib: “İndi çalışıram öyrənim ki, proses nə vaxt davam etdiriləcək”.
Qeyd edək ki, bu gün B. Hacıyevə hökm oxunacağı gözlənilirdi.
Bu il martın 4-də Gəncə Şəhər Nizami Rayon Məhkəməsinin qərarı ilə B. Hacıyev barəsində bir aylıq həbs-qətimkan tədbiri seçilib. Onun haqqında Cinayət Məcəlləsinin 321.1 (qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə yanvarın 24-də Gəncə Şəhər Prokurorluğunda cinayət işi başlanıb. Mayın 10-da keçirilən məhkəmə prosesində dövlət ittihamçısı B. Hacıyevin 2 il müddətinə azadlıqdan məhrum edilməsini istəyib.