Düşərgədə Azərbaycandan olan 49 qadın saxlanılıb
Qazaxıstandakı Azərbaycan diasporu Azərbaycanın repressiyaya məruz qalmış qadınlarının xatirəsinə Astana şəhərinin yaxınlığındakı Akmola qəsəbəsində memorial abidə ucaldıb. Bu barədə APA-ya Diasporla İş üzrə Dövlət Komitəsinin mətbuat xidmətindən bildirilib. Astana şəhəri “Xəzər” Mədəniyyət Mərkəzi ilə “Qazaxıstan Azərbaycanlıları Mədəniyyət Mərkəzləri İttifaqı”nın təşəbbüsü ilə ucaldılan abidə ötən əsrin 30-40-cı illərində “Akmola siyasi repressiyalara məruz qalmış şəxslərin həyat yoldaşları düşərgəsi”nin (“Akmolinskiy laqerğ jen politiçeskix repressirovannıx” “Aljir”) yerləşdiyi ərazidə qoyulub.
1936-1946-cı illərdə bu düşərgədə Azərbaycandan olan 49 qadın saxlanılıb. Onlardan əksəriyyəti elə həmin ərazidəki ümumi düşərgə məzarlığında dəfn olunub.