"Azərbaycan İranın nüvə məsələsinin hərbi yolla həllinə qarşı çıxır"
Azərbaycan İranın nüvə məsələsinin hərbi yolla həllinə qarşı çıxır. Simsar.az -ın məlumatına görə, bunu Azərbaycan XİN rəhbəri Elmar Məmmədyarov Rusiyanın "Moskovskiye novosti" qəzetinə müsahibəsində deyib.
"Müstəqil Azərbaycandan daha çox azərbaycanlının yaşadığı İranın qonşusu kimi, biz əlbəttə ki, məsələnin hərbi yolla həllini qəbul etmirik", - Məmmədyarov qeyd edib.
O əlavə edib ki, Azərbaycan nüvə silahına malik dövlətlərlə qonşuluqda yerləşməklə başa düşür ki, nüvə silahının yayılmaması siyasəti çox vacibdir.
"Lakin biz məsələnin hərbi yolla həllini qətiyyən qəbul etməyəcəyik", - Məmmədyarov təkrar edib.
İranın nüvə proqramı BAEA-da onun gizli fəaliyyəti məlum olduqdan sonra - 2003-cü ildən etibarən narahatlıq doğurub. 2003-cü ilin sonunda İran Nüvə silahının yayılmaması haqqında Müqaviləyə əlavə Protokolu imzalayıb və uranın zənginləşdirilməsi üzrə işlərin dayandırıldığını könüllü elan edib. Lakin sonralar yenidən bu fəaliyyətə qayıdıb.
Zənginləşdirilmiş urandan nüvə silahının istehsalı üçün istifadə oluna bilər. Bununla yanaşı, o, atom elektrik stansiyaları üçün yanacaq kimi də vacibdir. Bir sıra dövlətlər, o cümlədən ABŞ İranın nüvə silahı yaratmağa cəhd etdiyinə əmindir və hadisələrin belə inkişafının dayandırılmasını tələb edir.
Tehranın uranın zənginləşdirilməsindən imtina etməsinə cavab olaraq, BMT Təhlükəsizlik Şurası sanksiyalar tətbiq edib. Lakin İran bildirir ki, Nüvə silahının yayılmaması haqqında Müqavilənin iştirakçısı kimi onun nüvə texnologiyalarından dinc məqsədlər üçün istifadə etməyə tam hüququ var.
Mahsun Kırmızıgül Bakıya gəlir
Narkotik vasitələrin qanunsuz dövriyyəsi ilə məşğul olan şəxslər saxlanılıblar 
İlham Əliyev Berlindədir
Elmira Süleymanova vəfat etdi
.jpg)
