Rusiya enerji şirkəti olan Qazprom Türkiyədən keçməsi planlaşdırılan təbii qaz boru xətti üçün yeni bir şirkət quracağını açıqlayıb.
Rusiya Dövlət Başçısı Vladimir Putinin ötən həftə Ankaraya səfəri zamanı Türkiyə üzərindən yeni bir qaz kəməri qurulacağı müzakirə olunmuşdu.
Simsar.az-ın Türkiyə mətbuatına istinadən verdiyi xəbərə görə, Qazprom Türkiyədən keçəcək xətt üçün yeni bir şirkət quracağını açıqlayıb. Rusiyanın Sankt-Peterburq şəhərində qurulacaq şirkətin adı isə, "Qazprom Russkaya" olacaq.
Cənub Axını layihəsi ləğv olundu
Rusiya prezidenti Vladimir Putin Ankaraya səfəri zamanı prezident R.T. Ərdoğanla mətbuat konfransında Avropaya qaz daşıyan Cənub Axın Proyektinin ləğv edildiyini bildirmişdi.
Ləğv edilən Cənub Axın layihəsi Rusiya təbii qazını Qara dənizin altından Bolqarıstandan keçərək Avropaya daşıyacaqdı.
Ləğv edilən layihənin yerinə Türkiyədən keçəcək yeni bir boru xətti planlaşdırılır. Yeni boru xətti yenə Qara dənizdən keçəcək, lakin Türkiyədə quruya çıxacaq və Türkiyə üzərindən Yunanıstana uzanacaq.
Beynəlxalq mətbuat yeni layihəyə hətta "Türk axını" adını verib. Rusiya mətbuatı isə reallaşacaq layihəyə “Mavi Axın” adını qoyub.
Aysel Kərimova