Jurnalistlər arasında gələn ilin mayında Bakıda keçiriləcək Üçüncü Ümumdünya Mədəniyyətlərarası Dialoq Forumu və kəlağayı sənəti ilə əlaqədar “Ən yaxşı yazı”, “Ən yaxşı videosüjet” müsabiqələri təşkil olunacaq.
Simsar.az xəbər verir ki, bu barədə Azərbaycanın mədəniyyət və turizm naziri Әbülfəs Qarayev dekabrın 2-də keçirdiyi mətbuat konfransında bildirib. Bakıda keçiriləcək Üçüncü Ümumdünya Mədəniyyətlərarası Dialoq Forumunun artıq dünya tədbiri olduğunu bildirən nazir bu mötəbər Forumun UNESCO, BMT-nin Sivilizasiyalar Alyansı, Avropa Şurası, Avropa Şurasının Şimal-Cənub Mərkəzi, İSESCO, BMT-nin Dünya Turizm Təşkilatı tərəfindən dəstəkləndiyini xüsusi vurğulayıb. Bu il “Bakı prosesi”nin 6-cı ilinin tamam olduğunu söyləyən nazir Azərbaycan Prezidenti İlham Əliyevin Ümumdünya Mədəniyyətlərarası Dialoq Forumuna verdiyi dəstəyi xüsusi diqqətə çatdırıb.
Ə.Qarayev nazirliyin daxilində tarixi abidələrlə bağlı xüsusi qurumun yaradılmasının nəzərdə tutulduğunu da qeyd edib: “Bununla yanaşı, nazirlikdə informasiya şöbəsinin də yaradılması planlaşdırılır. İşlərimizin təbliğində KİV-nin nümayəndələri də iştirak etməlidirlər”.
Günel