“Hər hansı işəgötürən işçiləriylə icbarı sığorta sənədi imzalamayıbsa biz dərhal onları qanunvericiliyin müvafiq maddəsinə uyğun cəriməliyirik”.
Simsar.az xəbər verir ki, bunu Dövlət Əmək Müfəttişliyi Xidmətinin rəisi Fuad Əlizadə deyib.
O bildirib ki, 2013-cü ilin dekabrında 3 sığorta şirkəti ilə tərəfdaşlıq sazişi imzalanıb: “Mütəmadi olaraq məlumatlar bizə ötürülür. Əlimizdə olan son məlumata görə, ölkə bazarında 78% işçilər sığortlanıb. Sığortalanmayan işçilərlə bağlı profilaktik və inzibati yollarla tədbirlər aparırıq. Düşünürəm ki, növbəti ilin ilk 6 aylığında sığorta bazarında artıq bu göstərici tam əhatə olunacaq”.
Əməyin Təhlükəsizliyi və Sağlamlığı üzrə Milli Strategiyada işə götürənlərin risk qrupuna bölünməsinə münasibət bildirən F. Əlizadə deyib ki, bu proses yoxlamaların intensivliyinə təsir edəcək: “Yüksək risk qrupuna aid olan müəssisələrdə həm dövlət nəzarətinin intensivliyi artırılacaq həm də ictimai nəzarət gücləndiriləcək. Artıq Əməyin Təhlükəsizliyi və Sağlamlığı üzrə Milli Strategiya Nazirlər Kabinetinə təqdim olunub. Yəqin ki tezliklə onun tətbiqinə başlanılacaq”.
Aysel Kərimova