“Mən Milli Məclisin deputatının qondarma rejimdə keçirilən girovların müdafiəsi üçün vəkillik etməsini qeyri-mümkün hesab edirəm”. Simsar.az xəbər verir ki, bunu Milli Məclisin vitse-spikeri Bahar Muradova deyib. O bildirib ki, Azərbaycanın Milli Məclisinin deputatlarının özlərinin vəkillik etmək barədəki çağırışı düzgün deyil. “Bu, qondarma rejimin tanınması kimi dəyərləndirlə bilər. Qondarma qurumun qondarma hüquqi məhkəmə aktına etiraz edilməlidir. Amma bu, o demək deyil ki, biz Milli Məclis üzvləri girovların müdafiəsi üçün Qarabağa getməliyik. Beynəlxalq təşkilatlar bu məsələyə cəlb edilməlidir”,-deyə B. Muradova bildirib.
Qeyd edək ki, deputat İqbal Ağazadə Kəlbəcərdə girov götürülən Dilqəm Əsgərov və Şahbaz Quliyevin qondarma məhkəməsində onları müdafiə etmək üçün vəkillik etməyə hazır olduğunu bəyan edib.
Elmar Hüseynov