İnterAz televiziyasının rəsmi "facebook" səhifəsi dağıdılıb.
SalamNews xəbər verir ki, son günlər səhifənin əhatə dairəsi durmadan artmaqda idi. Belə ki, səhifənin əhatə dairəsi 5 milyonu (5.200.000) keçmişdi. Səhifəni bəyənənlərin (like) sayı isə 150 minə çatmışdı.
Ötən gün isə naməlum səbəbdən İnterAz-ın facebook səhifəsi silinib. Hal-hazırda mütəxəssislər problemin aradan qaldırılmasına çalışırlar.
Qeyd edək ki, bir neçə gün öncə İnterAz televiziyasının saytına da (www.interaztv.com) ardıcıl haker hücumu olub. Həmin hücumlar nəticəsində sayta girişlərdə bir neçə dəfə məhdudiyyətlər yaranaraq fəaliyyəti bir neçə dəqiqə dayanmışdı. Lakin mütəxəssislərin səyindən sonra hakerlər istəklərinə çatmamışdı.
Qeyd edək ki, eyni vaxtda bir İP ünvanlarından “SalamNews” agentliyinin saytına da haker hücumları olmuşdu.