Bu gün 1951-ci ildə Beynəlxalq Lal-karlar Federasiyasının təsis olunması ilə əlaqədar yaranıb.
BMT-nin statistikasına görə, hər 9 nəfərdən biri eşitmə qabiliyyətindən məhrumdur. Onlar bu qabiliyyəti anadangəlmə, xəstəlik və ya travma nəticəsində itirirlər.
Azərbaycanda da kifayət qədər eşitmə qüsurlu insanlar var. Dövlət tərəfindən lal-kar uşaqların cəmiyyətə inteqrasiyası üçün müəyyən işlər görülür. Simsar.az xəbər verir ki, 3 nömrəli Respublika xüsusi internat məktəbi də bu istiqamətdə ixtisaslaşıb.
Məktəb 1969-cu ildən fəaliyyət göstərir. Hazırda müəssisədə 645 lal-kar uşaq təlim-tərbiyə alır. Onların təhsili və tərbiyəsi ilə 250 nəfər müəllim, 177 nəfər tərbiyəçi məşğul olur.
İnternat məktəbində “Bacarıqlı əllər”, dama, futbol, rəsm dərnəyi fəaliyyət göstərir. Bununla yanaşı, məktəbin şagirdlərindən ibarət rəqs qrupu var.
2013-2014-cü tədris ilində məktəbi 51 nəfər şagird bitirib. Onlardan 9 nəfər orta ixtisas təhsili müəssisələrinə qəbul olub. Digər məzunların əksəriyyəti lal-kar şəxslər üçün axşam məktəbində təhsillərini davam etdirirlər.
Vüsal Məmmədzadə