Tanınmış mühacirətşünas alim, filologiya üzrə fəlsəfə doktoru, Dövlət Mükafatı laureatı Nikpur Cabbarlının “Azərbaycan mühacirət poeziyası (icmallar və portretlər)” adlı kitabı işıq üzü görüb.
Simsar.az xəbər verir ki, nəşrin elmi redaktoru filologiya elmləri doktoru, professor Şamil Körpülü (Vəliyev), rəyçilər filologiya elmləri doktoru Alxan Bayramoğlu (Məmmədov), Şahbaz Şamıoğludur (Musayev).
Kitabdakı icmal-oçerklərdə Azərbaycan mühacirət poeziyasının araşdırılma vəziyyəti dəyərləndirilir, onun təşəkkül və inkişafının özəlliklərindən bəhs olunur. Məhəmməd Sadıq Aran, Müseyib Zəyəm, Almas İldırım, Alazan Baycan və Teymur Atəşlinin yaradıcılığı haqqında qələmə alınan portret-oçerklər mühacirət poeziyası barədə zəngin təəssürat yaradır.
Azərbaycan Milli Elmlər Akademiyasının Nizami adına Ədəbiyyat İnstitutu Elmi Şurasının qərarı ilə nəşr olunmuş kitab bu sahənin mütəxəssisləri, ali məktəblərin müvafiq fakültələrinin tələbələri və geniş oxucu kütləsi üçün nəzərdə tutulub.