Moskvada yaxın xarici ölkələrin kinematoqrafiya uğurlarına həsr olunmuş “Dostların kinosu” adlı dördüncü beynəlxalq festival açılıb. Sumsar.az xəbər verir ki, sentyabrın 25-dən 29-dək Moskvanın bir sıra kinoteatrlarında MDB və Baltik ölkələrinin ən yaxşı filmləri göstəriləcək. Proqrama nüfuzlu beynəlxalq kinofestivallarda mükafatlara layiq görülmüş sənədli filmlər, animasiya və oyun filmləri daxil edilib. MDB və Baltik ölkələrindən təqdim olunmuş 15 film arasında Azərbaycan rejissoru Şamil Əliyevin “Çölçü” filmi də var.
Festival çərçivəsində MDB ölkələrinin kinematoqrafçıları ilə görüşlər, mühazirələr və performanslar da keçiriləcək. Filmlərin hamısı “Moskva kinosu” şəbəkəsinin kinoteatrlarında ( “Zvezda”, “Kosmos”, “Tula”, “Fakel”, “Kruqovaya panorama”, “Saturn” və “Sputnik”) göstəriləcək. Arzu edənlərin hamısı filmlərə baxa bilər, çünki giriş pulsuz olacaq.