“Obama ya özü, ya da köməkçilərinə tapşırmalıdır ki, Azərbaycanda QHT-lər haqqında qanun layihəsini oxusun və ona düzgün məlumat versinlər”.
Bunu Simsar.az-a Yeni Azərbaycan Partiyası (YAP) icra katibinin müavini, Milli Məclisin deputatı Siyavuş Novruzov ABŞ prezidenti Barak Obamanın Azərbaycanda QHT-lərin fəaliyyəti ilə bağlı səslədirdiyi fikirlərə münasibət bildirərkən deyib.
O bildirib ki, Azərbaycanda QHT-lərin fəaliyyət göstərməsi ilə bağlı kifayət qədər qanun var: “Azərbaycan dövləti digər dövlətlərdən fərqli olaraq, QHT sektoruna dövlət büdcəsindən maliyyə ayırır. Layihələrini təqdim edən QHT-lər dövlət büdcəsindən maliyyələşib. Dünyanın hər yerində olduğu kimi, xaricdən maliyyə almaq istəyən QHT-lər şəffaflığı təmin etməlidir. İstər ABŞ-da olsun, istərsə də Azərbaycanda QHT-lər oğurluqla, gizlin yolla maliyyələşə bilməz. Onlara verilən maliyyə təqdim olunan layihəyə uyğun olmalıdır. Ən əsası QHT-lər arasında ayrıseçkilik olmamalıdır. Məsləhət görərdim ki, Obama öncə bunlarla tanış olsun, sonra istədiyi bəyanatı verə versin”.
Məlumat üçün deyək ki, ABŞ prezidenti Barak Obama “Azərbaycan kimi yerlərdə qanunların QHT-lərin fəaliyyətini inanılmaz dərəcədə çətinləşdirdiyini” bildirib.
Hüseyn İbadlı