“Qeyri Hökumət Təşkilatları Azərbaycanın müvafiq qanunvericiliyinə zidd öhdəliklər hesabına xaricdən maliyyələşməməlidir”.
Bunu Simsra.az-a iqtisadi ekspert Ramil Osmanlı QHT-lərin xaricdən maliyyələşməsi məsələsinə münasibət bildirərkən deyib.
O bildirib ki, QHT adından da göründüyü kimi ictimai institutdur və vətəndaş cəmiyyətinin inkişafının lokomotividir: “Bu baxımdan, QHT-lərin dövlət tərəfindən birbaşa maliyyələşməsini təqdir etmirəm. Bütün sosial münasibətlərdə maliyyə asılılığı fərdin, yaxud cəmiyyətin inkişafının qarşısını alan başlıca faktordur. Hər bir halda, QHT-lərin kütləvi şəkildə dövlət maliyyəsi hesabına, büdcə vəsaitləri sayəsində fəaliyyəti də ziyanlıdır”.
Ekspert hesab edib ki, QHT-lərin xarici donorlardan maliyyələşməsi mənsub olduğu ölkənin mənafeyinə də uyğun gəlməyə bilər. Bu faktor da QHT-lərin dövlətdən asılılığını stimullaşdırır: “Dövlət əleyhinə istiqamətlənmə də QHT-lərin onsuz da məhdud olan maliyyə resurslarının itirilməsinə səbəb ola bilər”.
Hüseyn İbadlı