ABŞ ordusu Obamanın İŞİD-ə qarşı yeni strategiyası çərçivəsində ilk addımını atıb. Ordu Bağdadın cənub-qərbini vurub.
ABŞ Mərkəzi Komandanlığından (CENTCOM) verilən açıqlamada, Amerika hərbi təyyarələrinin Bağdadı vurmasının yeni strategiya çərçivəsində həyata keçrildiyi bildirilib. Açıqlamada qeyd edilib ki, “Bu hava hücumu öz vətəndaşlarımızı qorumaq məqsədi daşımayan ilk əməliyyatdır”.
Qeyd edək ki, ABŞ-ın İraqdakı bundan öncəki hava hücumları, bu ölkədəki ABŞ vətəndaşlarını və mənafeyini qarumaq, humanitar missiya və İraqlı qaçqınlara yardım məqsədi daşıyırdı.
Hücumlarda, İŞİD-in İraq ordusunu vurduğu bir mövqeyin yox edildiyi açıqlanıb.
CENTCOM-un açıqlamasında həmçinin, Sincar yaxınlarında İŞİD-ə aid 6 maşının da məhv edildiyi qeyd edilib. O da bildirilib ki, ABŞ İraqda ümumilikdə bu günə qədər 162 hava hücumu həyata keçirib.
Suriya hücum etsə, ABŞ qarşılıq verəcək
Digər yandan ABŞ, İŞİD-i yox etmək üçün, Suriyaya da hücum edə biləcək. ABŞ ordusu Suriya rejimi tərəfindən qarşılıq verilməsinə səssiz qalmayacaq.
ABŞ mediasında yer alan xəbərə görə, ABŞ-ın səlahiyyətli şəxsləri, Bəşər Əsəd hakimiyyətinin Amerika təyyarələrinə müdaxilə etməsi halında, ABŞ-ın cavab verəcəyini bildiriblər.
Vüsal Qarayev