15-20 sentyabr 2014-cü il tarixlərində Azərbaycan Milli Elmlər Akademiyasında AMEA akademik H.Əliyev adına Coğrafiya İnstitutunun təşkilatçılığı ilə Beynəlxalq Elmlər Akademiyası Assosiasiyasının Fundamental Coğrafi Problemlər üzrə Birləşmiş Elmi Şurası və REA Fundamental Coğrafi Problemlər üzrə Birləşmiş Şuranın “Xəzər dənizi regionunun coğrafi problemləri və ərazinin dayanıqlı inkişafına nail olmanın yolları” mövzusunda XVIII birgə sessiyası keçiriləcək.
AMEA-dan Simsar.az-a verilən məlumata görə, tədbirdə Rusiya (Moskva, Sankt-Peterburq, İrkutsk, Həştərxan və s), Belorusiya, Qazaxıstan, Gürcüstan və s. ölkələrdən 50-yə yaxın alim-mütəxəssis, eləcə də Azərbaycandan olan coğrafiyaçı alimlər, əlaqədar müəssisə və təşkilatlardan dəvətli nümayəndələr iştirak edəcəklər.
Sessiyada Xəzər dənizi regionunun fiziki, iqtisadi-sosial-coğrafi problemlərinin və eləcə də Avrasiya məkanında müxtəlif coğrafi (regional və yerli) ərazilərin dayanıqlı inkişafının kompleks şəkildə geniş müzakirəsi aparılacaq.
Qonaqlar üçün Bakı şəhəri üzrə ekskursiya, eləcə də tanışlıq məqsədilə Xəzər dənizinin sahilyanı əraziləri və Böyük Qafqazın Şimal-Şərq yamacına marşrutlar da təşkil olunacaq.
Aysel Kərimova