İctimai Palata şəhər rəhbərliyinə müraciət edəcək
İctimai Palata aprelin 16-da paytaxtda mitinq keçirmək üçün Bakı Şəhər İcra Hakimiyyətinə müraciət hazırlayıb. Müsavat Partiyası başqanının müavini Gülağa Aslanlı Simsar.az –a deyib ki, müraciət aprelin 11-da Bakı Şəhər İcra Hakimiyyətinə göndəriləcək.
Müraciəti aksiyanın təşkilatçıları olan Müsavat, Xalq Cəbhəsi, Milli İstiqlal və Klassik Xalq Cəbhəsi partiyaları imzalayıb: “Aksiyanı İctimai Palata keçirir. Mitinqlə bağlı son qərar İctimai Palatanın aprelin 9-da keçiriləcək sessiyasında veriləcək. Bundan sonra Bakı Şəhər İcra Hakimiyyətinə müraciət olunacaq”.
Gülağa Aslanlının sözlərinə görə, İctimai Palata aprelin 16-da mitinq keçirmək üçün “Nərimanov” kinoteatrının qarşısını, Akademik Mili Dram Teatrının qarşısındakı Füzuli meydanını və “Təbriz” kinoteatrının qarşısındakı meydanı istəyəcək: “Bu meydanlara icazə verilməsə, aksiya şəhərin mərkəzində olacaq. Amma mitinq mütləq keçiriləcək”.