Azərbaycanda avqust ayına qədər ilan, əqrəb, qaraqurd sancmasının statistikası açıqlandı
Bu il aprel ayından bu günə qədər Azərbaycanda qeydə alınan ilan və həşərat sancmalarının sayı açıqlanıb.
Səhiyyə Nazirliyinin Kliniki Tibbi Mərkəzinin Toksikologiya şöbəsinin müdiri Azər Maqsudov Simsar.az-a açıqlamasında deyib ki, aprel ayının 20-dən bu günə indiyə kimi 62 xəstə gürzə sancması, 14 nəfər əqrəb, 8 nəfər isə qaraqurd sancması ilə Kliniki Tibbi Mərkəzi Toksikologiya şöbəsinə yerləşdirilib. A.Maqsudov deyib ki, gürzə sancması ilə zərərçəkənlərdən 1 nəfər 13 yaşlı uşaq dünyasını dəyişib. Kəskin-ağır şok vəziyyətində rayondan gətirilmişdi. Bütün müdaxilələrə baxmayaraq mərkəzə daxil olmasından 5 saat sonra vəfat etdi.
“Qaraqurd və əqrəb sancması ilə mərkəzə daxil olanlar isə tibbi yardım göstərildikdən sonra evə buraxılıb. Əqrəb və qaraqurd sancması hadisələri əsasən Bakı ətrafı kəndlərdə qeydə alınıb. İlan sancma halları isə Azərbaycanın müxtəlif rayonlarında – Bərdə, Yevlax, Şəmkir, Qazax, İsmayıllı, Goranboy, Şamaxı, Ağsu, Hacıqabul, Kürdəmirdə, Qəbələdə, Bakı ətrafı rayonlardan – Qobustan, Qaradağ, Xəzərdə daha çox qeydə alınıb.
Hadisələrin sayını ötən ilin müvafiq dövrü ilə müqayisə edən A.Maqsudov hələlik ciddi artım olmadığını əksinə azalma olduğunu bildirib. Ötən il istilər başlayandan sentyabr ayına qədər ilan sancması ilə bağlı şöbəyə 128 müraciət daxil olmuşdu. Bu il isə avqusta qədər 62 nəfərdə ilansancma hadisəsi qeydə alınıb. Onun sözlərinə görə, ötən ilin müvafiq dövründə hadisələrin və müraciətlərin sayı daha çox idi. Amma getdikcə müraciətlərin sayının artması gözlənilir.
“Dərmanların əlavə təsiri ilə bağlı aprel ayından indiyə kimi şöbəyə 38 müraciət daxil olub. Onlardan 2 nəfər uşaq, 9 nəfər qadın, 27 nəfər isə kişi olub.
Uşaqların zəhərlənməsinə isə əsas etibarilə antibiotik tərkibli preparatlar və polivitaminlərin qəbulu səbəb olub”.
Aysel Kərimova