“Rusiya Qərblə bir sıra məsələlərdə qarşıdurma vəziyyətindədir. Amma Dağlıq Qarabağ məsələsində fikirlər üst-üstə düşür.”
Bunu Simsar.az-a sabiq diplomat, politoloq Fikrət Sadıqov deyib.
O bildirib ki, hər iki tərəf bu günə kimi Ermənistanın nazı ilə oynayır. Bu siyasət davam edənə qədər Dağlıq Qarabağ məsələsi həll olunmayacaq: “Ermənistan bunu nəzərə alır, indiyə qədər bu cür siyasət apararaq torpaqları boşaltmır və dünyada gedən poseslərlə ayaqlaşmaq istəmir. Eyni zamanda beynəlxalq təşkilatların qətnamələrini inkar edir. Bizə isə real və konkret nəticələr lazımdır”.
F.Sadıqov hesab edir ki, Qərb və bir sıra Avropa ölkələri Ukraynada baş verən proseslərdən sonra Rusiyadan Avropaya qazın nəql edilməsində problemlər yaranacağını anlamalıdırlar: “Bu məsələdə Azərbaycanın rolu daha böyük olacaq. Artıq bu gün Avropa qitəsinin enerji təhlükəsizliyini təmin edə bilirik. Bundan sonra Azərbaycana daha böyük ehtiyac olacaq. Bunu aparıcı dövlətlər yaxşı dərk etməlidir. Təbii ki, bununla bağlı bizim diplomatiyamız daha hücumedici siyasət aparmalıdır ki, aparıcı dövlətlərin əsas qüvvələri bunu başa düşsünlər və müəyyən nəticə çıxara bilsinlər”.
Hüseyn İbadlı
Siyasət Şöbəsi