Şəhid-şəhid bölünürük,
Şəhid-şəhid böyüyürük...
Şəhid-şəhid danışırıq,
Şəhid-şəhid öyünürük.
Şəhid-şəhid yaşayırıq,
Şəhid-şəhid döyünürük.
Şəhid-şəhid böyüdük biz,
Tut başını dimdik, Vətən.
Bu dünyaya sənin üçün,
Şəhid kimi gəldik, Vətən!
Doqquz milyon insan şəhid,
Doqquz milyon can yaralı,
Bu gün hamı can üstədi,
Can Azərbaycan yaralı.
Qoyma düşmən görsün bunu,
Ört Azərbaycan, yaranı.
Əsas odur dar gündə də
Yumruq kimi birik, Vətən,
Bu dünyaya sənin üçün
Şəhid kimi gəldik, Vətən!
Məzara on şəhid qoysaq,
Beşiyə yüz oğul gələr,
Hər oğulun doğumuyla,
Şəhidlərin ruhu gülər.
Bu günədək sənin ilə
Nələr gördük, bizlər, nələr.
Biz nə qədər qəm atlatdıq,
Dərdə sinə gərdik, Vətən,
Bu dünyaya sənin üçün,
Şəhid kimi gəldik, vətən!
Elxan Yurdoğlu
01-08-2014 Bakı