İsveçrədə keçirilən Montrö Beynəlxalq caz festivalı çərçivəsində Azərbaycanın Xalq Artisti, dünya şöhrətli muğam ifaçımız Alim Qasımovun konserti təşkil edilib. Artıq 48 dəfədir ki, dünyanın ən məşhur və virtuoz musiqiçilərini bir araya gətirən bu musiqi bayramında ölkəmiz yenə də müxtəlif tədbirlərdə təmsil olunmaqdadır.
Simsarşaz xəbər verir ki, iyulun 19-dək davam edəcək festival günlərində gənc virtuoz ifaçı, 2009-cu il Montrö Beynəlxalq musiqi festivalının qalibi, Əməkdar Artist İsfar Sarabski, Əməkdar Artist Rəşad Haşımovun rəhbərlik etdiyi “Rast” qrupunun, məşhur saksofon ifaçısı Meseo Parkerin birgə konsertləri, həmçinin Əməkdar Artist Natiq Şirinovun rəhbərliyi ilə “Natiq ritm” qrupunun çıxışları təşkil ediləcək.
Bununla yanaşı, Natiq Şirinov nağara, Coşqun Sadıqov isə balaban üzrə ustad dərsləri keçəcəklər. Artıq üç ildir ki, Azərbaycan Respublikasının Dövlət Neft Şirkəti bu festivalın rəsmi tərəfdaşlarındandır.
Günel