Azərbaycanın xarici işlər naziri Elmar Məmmədyarov Bakıda səfərdə olan İsrail xarici işlər naziri Aviqdor Libermanın rəhbərlik etdiyi nümayəndə heyətini qəbul edib.
Xarici İşlər Nazirliyindən verilən məlumata görə, görüşdə Azərbaycanla İsrail arasında əlaqələrin mövcud səviyyəsindən məmnunluq ifadə olunub.
Tərəflər siyasi, iqtisadi, ticarət, elmi-texniki və humanitar sahələrdə əməkdaşlığın inkişaf etdirilməsi məsələləri ətrafında müzakirələr aparıb.
E.Məmmədyarov qonaqlara Dağlıq Qarabağ danışıqları barədə məlumat verib. Münaqişənin həlli üçün Ermənistan silahlı qüvvələrinin işğal edilmiş Azərbaycan ərazilərindən çıxarılmasının vacibliyini önə çəkən nazir qeyd edib ki, münaqişə Azərbaycanın ərazi bütövlüyü və suverenliyi çərçivəsində həll edilməlidir.
Öz növbəsində A.Liberman Azərbaycandakı yəhudi icmasının iki ölkə arasındakı münasibətlərin inkişafında rolunu müsbət qiymətləndirib.