Tələbə Qəbulu üzrə Dövlət Komissiyası (TQDK) aprelin 20-də keçirilən sınaq imtahanlarının test suallarında aşkar edilən səhvlərlə bağlı abituriyentlərin narazılığına aydınlıq gətirib.
Komissiyanın mətbuat xidmətinin rəhbəri Elnur Nağızadə Simarş.az-a bildirib ki, narahatlığa əsas yoxdur. Qeyd edib ki, suallardan yalnız birində yanlışlıq olub:
“TQDK bu yanlışlığı aradan qaldırmaq üçün sual ulduzla işarələnib. Qaydalara əsasən hər hansı test tapşırığında səhv olarsa, o test abituriyentlərin xeyrinə həll olunur. Sınaq imtahanıdır, uşaqlar özlərini yoxlayır və texnologiya da sınaqdan keçir. Burada qeyri-adi heç nə yoxdur. Bununla bağlı bizim öz ekspert şuramız iş aparır”.
BDU tarix müəllimi, ekspert Kamran Əsədovun ötən gün imtahan sualları ilə bağlı yaydığı qeydlərə gəlincə isə E.Nağızadə bildirib ki, TQDK-nın bu adda eksperti yoxdur: “Bizdə belə ekspert yoxdur. Həmin şəxs özünü ekspert kimi təqdim etməsin”.