Millət vəkili Fazil Mustafa Həzrəti Peyğəmbərin mövlud gününün Azərbaycanda necə keçirilməsi ilə bağlı öz facebook səhifəsində yazıb. Həmin yazının maraqlı olduğunu nəzərə alaraq təqdim edirik:
Türkiyə səfirliyinin Park İNN hotelində Hz.Məhəmmədin (S.Ə.S.) doğum günününə həsr olunmuş tədbirinə dəvət almışdım. Gözəl və anlamlı bir tədbir oldu. "Kutlu doğum" həftəsi 1988-ci ildən başlayaraq Türkiyə Diyanət Vakfı tərəfindən müntəzəm olaraq keçirilir. Bu Peyğəmbər sevgisini göstərən mükəmməl bir davranışdır. Qəribədir ki, İslam deyəndə özlərini qabağa verib böyük-böyük danışan bizim dini quruluşlar və bu sahəyə cavabdeh rəsmi strukturlar hələ də bu doğumu "kutlu" hesab etmirlər. Etsəydilər, heç olmazsa İslam Peyğəmbərinə sayğı göstərərək ildə bir dəfə formal tədbirlər keçirərdilər, televiziyalarda bu barədə insanları bilgiləndirərdilər. Sanki bu məsələ ancaq Türkiyədən gələn insanların işidir. Azərbaycansayağı müsəlmanlıq dediyimiz də elə budur.