Bu gün aprelin səhər saatlarında İmişli rayonunun Məzrəli kəndində ev yanıb. Simsar.az xəbər verir ki, kəndin inzibati ərazi dairəsi üzrə nümayəndəsi Elmiq Hüseynov açıqlamasında bildirib ki, yanan ev kənd sakini Əlheydər Nuriyevə məxsus olub: “5 otaqlı, 110 kvadratmetr olan birmərtəbəli ev içindəki cehizlik və qızıl- zinət əşyaları ilə birlikdə yanıb”. Vətəndaşa dəymiş zərərin 50 min manatdan yuxarı olduğunu deyən E. Hüseynov evin sığortalı olmadığını da vurğulayıb.
Yanğının səbəbi qısaqapanma olub. Yeri gəlmişkən, icra nümayəndəsi bildirib ki, bir qədər əvvəl kənddə daşınmaz əmlakın sığortasının vacibliyi ilə bağlı təbliğat işləri aparılıb, amma sakinlərin əksəriyyəti, o cümlədən yanan evin sahibi buna lazımi maraq göstərməyib.
Xatırladaq ki, "İcbari sığortalar haqqında" Qanuna əsasən, adı çəkilən kənddəki evləri illik 30 manat ödəməklə sığortalamaq mümkündür. Hadisə baş verəcəyi təqdirdə ev sahibi 15 min manata qədər sığorta ödənişi ala bilər.
Günel