Ankaradakı Türk Dünyası Araşdırmaları Beynəlxalq Elmlər Akademiyasının Beynəlxalq Mükafat Komitəsi Azərbaycan Aşıqlar Birliyinin sədri, Xalq Şairi Zəlimxan Yaqubu türk ədəbiyyatına yüksək xidmətlərinə görə “Nazim Hikmət” Beynəlxalq Ədəbiyyat Mükafatına layiq görüb.
Azərbaycan Aşıqlar Birliyinin katibi Musa Nəbioğlu Simsar.az-a bildirb ki, iki ildə bir dəfə türk dünyası ədibləri arasından bir nəfərin təltif olunduğu bu mükafata Azərbaycandan ilk dəfə Zəlimxan Yaqub layiq görülüb.
M.Nəbioğlu qeyd edib ki, təkcə Azərbaycanda deyil, bütün türk dünyasında məşhur olan və əsərləri sevilə-sevilə oxunan Xalq Şairi Zəlimxan Yaqub indiyədək bir sıra xarici ölkələrin, o cümlədən türkdilli dövlətlərin beynəlxalq mükafatlarını qazanıb.