Nazirlik: “Bakalavr təhsilin dünyanın inkişaf etmiş ölkələrindəki səviyyəyə qaldırılması nəzərdə tutulur”
Bir müddət öncə Milli Məclisin plenar iclasında millət vəkili Musa Qasımlı azərbaycanlı tələbələrin, bakalavr təhsilini Azərbaycanda, magistr təhsilini isə xaricdə almaları ilə bağlı təklif irəli sürmüşdü. O, demişdi ki, belə sistem tətbiq olunarsa Azərbaycan elminin xaricə çıxışı sürətlənər.
Bəs Təhsil Nazirliyinin bu məsələyə münasibəti necədir? Yaxın gələcəkdə tələbələrimizin bakalvr təhsilini Azərbaycanda magistr təhsilini xaricdə almaları üçün vahid sistem tətbiq oluna bilərmi?
Təhsil Nazirliyi Simsar.az-ın sorğusuna cavab olaraq bildirilib ki, “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı"na müvafiq olaraq ali təhsilin hər 3 səviyyəsində xaricdə təhsil nəzərdə tutulur”. Lakin bu zaman magistratura və doktorantura səviyyəsində təhsilə prioritet verilir.
Təhsil Nazirliynin məlumatında respublika ali təhsil müəssisələrində bakalavr təhsilinin dünyanın inkişaf etmiş ölkələrindəki səviyyəyə qaldırılmasının nəzərdə tutulduğu qeyd olunub. “Bu istiqamətlərdə atılan əhəmiyyətli addımlardan biri olan "SABAH qrupları" layihəsi bu tədris ilindən reallaşdırılacaq”.
Aysel Kərimova