Türkiyədə keçirilən bələdiyyə seçkiləri zamanı baş vermiş qarşıdurmalar zamanı ölənlərin sayı 8, xəsarət alanların sayı isə 42 nəfərə çatıb.
Simsar.az-ın məlumatına görə, bələdiyyə seçkiləri zamanı Türkiyənin müxtəlif bölgələrində qarşıdurmalar baş verib.
Vanın Çaldıran rayonunda muxtarlığa namizədlər arasında qarşıdurma nəticəsində 4 nəfər yaralanıb. Xəsarət alanlar xəstəxanaya yerləşdirilib.
Hatay vilayətinin Kırıkhan rayonunda namizədlər arasında qarşıdurma olub. Nəticədə iki nəfər ölüb, 9 nəfər yaralanıb.
Yozqat vilayətinin Türkmənsarılar kəndində iki qrup arasında dava düşüb. Qruplar bir-birlərinə daş və dəyənəklərlə hücum edib. Nəticədə 3 nəfər yaralanıb.
Rize vilayətində də qarşıdurma olub. Belə ki, iki nəfər arasında mübahisə yaranıb və dava düşüb.
Polis əməkdaşları tərəfləri ayırmağa çalışarkən bir polis ayağından güllə ilə vurulub.
Ərzurumun Əziziyyə rayonunda iki muxtarlığa namizədin yaxınlarının davasında isə 6 nəfər yaralanıb.
Qaziantep vilayətində hakim Ədalət və İnkişaf Partiyasından namizədliyini irəli sürmüş şəxs və 3 nəfər yaxını seçki məntəqəsindəki qarşıdurma zamanı yaralanıb.
Xatırladaq ki, Hatay vilayətinin Gölbaşşı kəndində muxtalığa namizədlər arasında silahlı insident baş vermişdi. Hadisə zamanı iki nəfərin açılan atəş nəticəsində öldüyü, 9 nəfərin isə ağır yaralandığı bildirlirdi. Şanlıurfa vilayətinin Çankaya qəsəbəsində isə muxtarlığa namizədlər arasında dava düşmüşdü. Qarşıdurma nəticəsində biri polis olmaqla 3 nəfər yaralanmışdı.